أساسيات الموقع الناجح
ناس كتير بتاخدها الحماسة وتبدأ تعمل مدونة وتستعجل وتروح تشتري دومين .. أو تاخده مجاني (غلط جداً) .. وبعدين تشتري قالب .. أو تدور عليه مضروب (مصيبة كبيرة) .
وتبدأ تدورعلى مقالات تنسخها أو تعيد صياغتها وتحط شوية صور وتملى الموقع ب 100 ولا 200 أو حتى 500 مقال وتستنى يدخل زوار.
يعدي اسبوع في شهر أو أكتر وتلاقي الدنيا واقعة .. الأرشفة بطيئة أو كانت شغالة وتقف .. مفيش ترتيب في نتايج بحث جوجل .. زوار قليلين أو مفيش خالص .. تقدم على أدسنس يترفض .. الخ من اللي بنشوفه من المشاكل والأسئلة واليومية.
 |
| افضل طريقه لانشاء موقع او مدونه ناجحه |
طب إيه المشكلة وليه كل ده بيحصل ؟ وإيه الحل والصح عشان نعمل مدونة ناجحة ونكسب منها ؟
ندخل في المفيد صحصح كده وركز معايا
عشان تعمل موقع ناجح وتكسب منه لازم تعمل أساس صح تبني عليه الموقع أو المدونة والأساس ده فيه خطوات مهمة جداً لازم تمشي عليها أولها .
هتخطط للمدونة كاملة على الورق ايوه على الورق لأنك سهل ترسم وتشخبط فيه وتهد الكتابة وتعيدها من تاني أو تقطعها وترميها وتجيب ورقة تانية ومش هتخسر حاجة بالعكس .
هتلاقي نفسك مستمتع وانت بتخطط لمشروعك وتتلافي الأخطاء وانت قاعد في مكانك من قبل ما تدفع قرش واحد من جيبك ده غير الأفكار اللي هتخطرعلى بالك وتنفعك فيما بعد وانت بتكتب وشغال بخيالك ..
انما تتسرع وتشتري دومين وقالب وتعمل شوية مقالات وتلاقي كله في الاخر طلع غلط أو فيه مشكلة يبقى خسرت وقت وفلوس وتعب .
ويا اما تهد كل اللي عملته وتبدأ فيه من جديد بنفس الفكر ويطلع غلط تاني .. أو يجيلك احباط وترمي كل حاجة وتكره الموضوع من أساسه .. دي الحقيقة ولا كلامي مش صح ؟
نرجع تاني للورق ومضمونه .. إزاي تعمل موقع ناجح ؟
1- التخصص
اختار تخصص انت بتحبه وعندك شغف تدور فيه كل يوم على أي جديد .. وركز في كلمة تخصص لأن ناس كتير فاهمة الكلمة غلط ..
لما بسأل واحد عن تخصص موقعه يقولي تقني ولما ادخل المدونة الاقيها موبايل على كمبيوتر على العاب على برامج على اندرويد على ويندوز .
صحيح هما كلهم ممكن يندرجوا تحت تصنيف واحد .. بس مع احترامي ده اسمه سمك لبن تمر هندي ..
عمرك شوفت كمثال مدرس تخصصه كيمياء وفلسفة ؟ مع ان هما الاتنين تدريس ..
او ميكانيكي بيشتغل في العربيات والموتسيكلات ما الاتنين برضو ميكانيكا ..
نفس الحكاية لما تحب تعمل موقع لنفسك لازم تتخصص ..
لو انت بتحب التقنية تختار منها تصنيف واحد بس عشان تقدر تربط كل مقالاتك واقسامك ببعض وتتابع كل جديد فيه ..
انما غير كده هيحصل تشتت وتفشل ده غير ان جوجل مش هيقرأ موقعك صح ..
إلا إذا معاك ميزانية دولارية بمبلغ محترم وتيم محترف شغال ومتقسم على أقسام الموقع وبتكتب في كل ما يخص المجال ..
تقريباً برضو مش هتقدر تسد فيه وتدي كل معلومة حقها. الكلام اللي فوق يخص اي مجال طبي .. سياحة .. طبخ .. تقني .
2- التحليل
بعد ما استقريت على التخصص يجي دور التحليل
- مستوى المنافسة فيه هل هي صعبة جدا ومفيش فايدة منه ف تسيبه وتدورعلى غيره ولا فيه ثغرة تقدرتدخل منها ومع الوقت تكبر وتنافس ولا سهل وتقدر تتوكل على الله وتبدأ فيه
-إيه هي مشتقاته وهل ممكن تتقسم وكل مجموعة تدخل في قسم من أقسام الموقع.
- هل له معلنين لأنك عشان تكسب منه لازم يبقى فيه اعلانات تخص المجال.
- له منتجات تسويقية وأفلييت لأن الربح من المدونات والمواقع مش ادسنس بس .. لكن فيه أنواع تانية من الربح على سبيل المثال أفلييت على منتجات تخص المجال في السوق .. والأفلييت عبارة عن أنك بتقوم بعملية تسويق للمنتج التابع لتخصصك وبتاخد عليه عمولة يعني نسبة من الربح .
- مستوى صعوبة الكلمات المفتاحية لأن الموقع الجديد غير اللي عدى عليه سنة غير اللي بقاله سنين لكل واحد فيهم كلماته اللي تختارها وتشتغل عليها بعد ما تقسمها ل3 مستويات (سهلة – متوسطة – صعبة) وكل مرحلة ولها كلماتها.
ومتنساش اكتب الاقسام المناسبة للمدونة وتحت كل قسم مجموعة من الكلمات اللي تنفع تكون تحته.
3- كتابة المقالات بعد ما استقريت على التخصص واختيار الكلمات المناسبة له وتقسيمها بحسب مستوى المنافسة مع الأقسام المناسبة ..
نيجي لمرحلة كتابة المقالات خلي بالك كل ده لا اشترينا دومين ولا حتى القالب لسة شوية عليهم وهتعرف ليه ..
المهم عشان تكتب مقال مينفعش تروح تاخد المعلومة كوبي بيست وتعدل عليها وخلاص .. لازم شوية تأني وتركيزبمعنى
الكلمة المفتاحية اللي هتكتب بيها المقال بتقسمها الأول لأجزاء على الورق وكل جزء بيبقى عبارة عن معلومة مستقلة بذاتها بس بتكمل اللي قبلها كمثال :
انت هتكتب عن حل مشكلة الشاشة الزرقاء في ويندوز 7
المقال هنا بيتقسم اجزاء ومتنساش كل جزء بعنوان (h2)
وإذا كل جزء هيتقسم لأجزاء أصغر هتحطها تحت (h3) وهكذا..
- مقدمة
- تعريف
- السبب
- الحل
- خاتمة
.. إلخ بحسب احتياج المقال بدون حشو وتكرار للكلمات المفتاحية كتير من غير لازمة ومتنساش الكلمات البديلة او المرادفات للكلمة المفتاحية ..
وفي مثالنا اللي فوق المرادفات هتكون كمثال
شاشة الموت – شاشة الموت الزرقاء – شاشة بلون ازرق وممكن كمان بتبقى برقم او كود محدد الخ ..
المهم كل جزء من المقال اللي فوق بتبحث فيه لوحده سواء في مواقع عربي أو أجنبي وأفهم كويس المعلومة وبعدين اكتبها من دماغك بكده استحالة يطلع سطر واحد مكرر او منسوخ في اي موقع تاني ..
متنساش كمان مهم جداً تنسيق المقال بخط واضح وسطور متباعدة مع تفادي الأخطاء الإملائية واختيار ألوان متناسقة مش مرهقة أو متعبة للعين ..
هتقولي الموضوع متعب ومرهق .. طب ما احنا اتفقنا من البداية انك بتختار التخصص اللي بتحبه وشغوف بيه عشان يبقى سهل تستوعبه وما تملش منه وتكمل فيه وتطورمن نفسك وفي المدونة
ملحوظة : (سواء اخدت المعلومة من موقع اجنبي أو عربي لازم تحطها مصدر كدليل اثبات ان معلومتك صحيحة وخاصة المواقع الصحية والطبية بشرط يكون المصدر ثقة ومتخصص ومشهور هو كمان)
في البداية وقبل اطلاق الموقع هتحتاج عدد مقالات افتتاحية للمدونة وليكن 10 مقالات بشرط زي ما قولنا تكون بتكمل بعض وده لأنك اول ما تبدأ الموقع مينفعش يكون فاضي ..
الموضوع ده هيفيدك في انك لما تقدم في السيرش كونسول جوجل يشوف موقع له اساس وشبه متكامل ويقرأ تخصصه من أول مره ويصنفه في الفهرس المناسب له ..
لكن بعد كدا اكتب براحتك وعدد المقالات مش مهم ولو مش هتكتب كل يوم برضوا مش مهم لأنك مش موقع اخباري انت متخصص حتى لو 2 او 3 مقالات في الإسبوع كفاية ..
بس الأهم المقال يكون على درجة عالية من الجودة وخالي من الأخطاء الإملائية ويوفي المعلومة حقها ..
ومرتبط بالمقالات اللي قبله عشان الزائر يخرج من عندك وهو مبسوط انه لقى الحل وما يحاولش يدور في حتة تانية بالعكس ممكن يدور في موقعك على معلومة تانية تفيده ودي عند جوجل حاجة مهمة وكبيرة وبتدي ثقة في موقعك انه مميز..
- الصور مش أي صورة تجيبها من أي مكان وتحطها في المقال ده غلط جدا ويضر بمدونتك فيه أساسيات لإختيار الصورة :
- معبرة وشديدة الصلة بالموضوع او الفقرة اللي بتكتب فيها - مفيش عليها حقوق ملكية وتقدر تجيبها من مواقع كتير يكفيك تكتب في بحث جوجل Free Photo cc وهتلاقي مواقع كتير بتديلك الصورة مجانا ومتاح استخدامها.
- ضغط الصورة وتحويلها للصيغة اللي بيحبها جوجل قبل رفعها وده مهم جداً للسرعة والأداء وبلاش الصور الكبيرة جداً لأن الزائر اخره يفتح موقعك على موبايل 6 بوصة وحتى لو كمبيوتر يكفيك صورة عرضها ميزيدش عن 600 بكسل وده موقع بيحول الصورة وتقدر تعدل في مقاسها squoosh
- وصف الصورة والنص البديل مهم جداً لجوجل وللزائر
كده انت خلصت المرحلة الأولى والأصعب في بداية مشروعك ندخل على المرحلة التانية ..
4 – اسم الموقع والدومين هنا هتبدأ تختار اسم مناسب لموقعك ركز في كلمة اسم مش دومين ومن شروطه يكون فريد من نوعه ومش مكرر في اي موقع تاني ولو حتى بجزء منه ..
ومتقولش صعب ومش هلاقي اعصر دماغك وهات ورقة فاضية مخصوص للموضوع ده واكتب كل اللي يخطر على بالك من اسامي تنفع واملا الورقة ..
بعدين افتح جوجل وكل اسم منهم تحطه في البحث بالترتيب واللي تلاقيه موجود او مكرر تشطب عليه ولما توصل لإسم مناسب تحط حواليه دايرة وترجع تكمل لغاية ما تخلص الورقة كلها ..
في النهاية هتلاقي عندك اسم او اكتر واللي يعجبك فيهم وتلاقيه مميز عن التاني هو ده اللي هتختار له دومين ومش شرط الدومين يبقى بنفس الحروف لكن بنفس النطق المهم يكون قصير وسهل النطق لأن اللي هيبحث باسم موقعك هيكتبه عربي مش انجليزي ..
عشان كده بأكد تاني اسم الموقع اهم من الدومين
(من أطرف ما شوفت وصراحة كانت فكرة مميزة صديق لنا هنا في الجروب اختار اسم لموقعه مكون من جزئين مرتبطين ببعض بطريقة فريدة وملفتة اللي عايز أقوله ان افكارك وخيالك ملهاش حدود المهم حاول).
ابعد عن الدومينات المجانية لأسباب كتير مفيش وقت ولا مجال لذكرها حالياً..
واياك تختار دومين كان موجود قبل كده مع حد وسابه الا لما تكشف عليه في موقعين
- archive
وده هيقولك التخصص واللغة اللي كان شغال بيه ولو لقيته عكس لغتك وتخصصك انساه ودور على غيره لكن لو طلع مناسب تاخده وتروح للموقع اللي تحت.
- Moz وده مهمته يكشف عليه ويشوف اذا كان اخد سبام سكور ولا نضيف وبكده تضمن دومين مميز نضيف ومش متعاقب من جوجل.
5- القالب جزء مهم من اساسيات الموقع لازم يكون سريع وأكواده خفيفة ونضيفة وصديق لمحركات البحث ومش شرط يكون مدفوع او مجاني ..
وضروري تفرق بين المجاني فعلاً من مصدره والمضروب الأول ده صاحبه او مطوره بيكون عمل نسخة مجانية من المدفوعة للإشهار واحيانا بتكون ناقصة في المميزات لكن شغال ومفيد ومفيش فيه اي مشكلة والأفضل تحمله من مصدر اللي هو موقع المطور ..
أما اللي كان مدفوع واتهكر او اتعدل في اكواده ومنتشر في كل حتة تحت اسم مجانا ده ترميه في الزبالة واياك تقرب منه.
الخلاصة اللي فات كان عبارة عن تعريف بجزء من الأساسيات للمبتدئين واللي لسه مش عارفين يمسكوا طرف الخيط .. بس هل ده كل حاجة ؟ لأ طبعاً بالعكس لكن دي مهمتك إنك تكمل بحث وتسأل وتعرف أكتر، وده احنا هنوفره ليك فى تدوينات تانيه منفصله ومشروح فيها كل نقطه بالتفصيل علشان تقدر تمشى على خطى صحيحه وثابته وتقدر من خلالها تحقق دخل محترم يعتمد عليها..وبالتوفيق للجميع
تعليقات
إرسال تعليق